Higit sa Pamumuno, ay Kalinga

Sa loob ng 23 taon ko sa kumpanya, napakarami ko nang nakilala, nakasama, at natutunan. Marami na rin akong pinagdaanang experiences, trainings, workshops, at coaching na humubog sa akin hindi lamang bilang isang professional, kundi bilang isang lider. 

Ngunit sa lahat ng mga aral na aking natutunan, may isang simpleng paalala mula sa isa sa mga nauna kong naging leader na hanggang ngayon ay dala-dala ko: “Magkaroon ng malasakit.” 

Para sa akin, ang malasakit ay kalinga. 

Naniniwala ako na ang tunay na tiwala ay nabubuo kapag nararamdaman ng isang tao na ang intensyon mo ay hindi lamang upang matapos ang trabaho, kundi dahil tunay kang may malasakit. Bilang Head, ayaw kong maramdaman ng mga kasama ko na ako ay isang boss lamang. Gusto kong maramdaman nila na mayroon silang taong maaari nilang sandalan—isang taong handang makinig, umunawa, at umalalay. 

Parang isang Nanay na kumakalinga. 

At minsan, hindi naman kailangang malaki ang gawin. 

Minsan, sapat na ang simpleng, “Kumusta ka?” 

Sa simpleng pangangamusta, mas nakilala ko ang mga taong kasama ko sa trabaho. Mas naintindihan ko ang kanilang mga pinagdadaanan, pangangailangan, at maging ang mga bagay na hindi nila agad nasasabi. At dahil dito, mas natutunan kong piliin ang tamang paraan ng pakikipag-usap at pakikitungo sa bawat isa. 

Doon ko na-realize na ang kalinga ay hindi lamang tungkol sa pag-aalaga. Ito ay tungkol sa pagpaparamdam na may nakikinig, may nakakaunawa, at higit sa lahat, hindi ka nag-iisa. 

At naniniwala rin ako na ang kalingang nararanasan ng isang empleyado ay siya ring kalingang maipapasa niya sa iba. 

Kapag nararamdaman ng mga taong kasama mo sa team na sila ay pinapahalagahan, pinakikinggan, at inaalagaan, mas nagiging natural para sa kanila na iparamdam din iyon sa bawat customer na kanilang makakasalamuha. Ang kalinga ay nagiging bahagi ng paraan nila ng pagtatrabaho—mula sa pakikitungo sa kanilang mga kasamahan hanggang sa pag-aalaga sa bawat customer na kanilang pinaglilingkuran. 

Dahil ang malasakit ay parang isang bagay na ipinapasa. Kapag naranasan mo ito, mas madali mo rin itong maibigay sa iba. 

Sa loob ng 23 taon, marami na ang nagbago—mga tao, proseso, teknolohiya, at paraan ng pagtatrabaho. Ngunit ang simpleng aral na “magkaroon ng malasakit” ay nanatili sa akin. 

Dahil para sa akin, ang pagiging lider ay hindi lamang tungkol sa pagbibigay ng direksyon o paggabay sa isang team. 

Higit sa pamumuno, ay kalinga. 

Kalinga sa mga taong ipinagkatiwala sa iyo. Kalinga na nararamdaman, naipapasa, at sa huli, nararanasan din ng bawat taong ating pinaglilingkuran. 

At kung may isang bagay akong nais maiwan sa mga taong nakasama ko sa 23-year journey na ito, iyon ay ang pakiramdam na, sa kabila ng mga hamon at pagbabago, may isang lider na nagmalasakit, nakinig, at hindi sila hinayaang mag-isa.